قصة دكتوره هدير السيد في زمن الكرونا
قصة دكتوره هدير السيد في زمن الكرونا
أنا حابة أوضح كذا نقطة بس لأن اللوك لوك والكلام كتر
انا كطبيب امتياز بمستشفي الزهراء الجامعي تعرضت لظلم من ادارة الزهراء ووزارة الصحة وجيراني اللي ساكنين في نفس العمارة.
نيجي لأول حاجة ..ادارة الزهراء.
الموضوع بدء يوم ١-٥ لما اسمي نزل اجباري في نابطشيات استقبال الطوارئ وكان ممنوع احول لاي راوند وممنوع احول برة المستشفي..نزلت ٥ نابطشيات كل نابطشية ١٢ ساعة واللي في الصورة دي وسايل الحماية اللي كانت متوفرالي والتزمت بيها كاملة وكان بطبيعة عملي بتعامل كل يوم مع حالات مشكوك فيها وكنت شغالة مع طاقم طبي اكتشفت بعد كدة انه معظمه اتصاب... بالرغم من كدة متوفرليش اي مسحات لحد الخميس ٧-٥ بالليل وكانت ادارة المستشفي بتغطي ع عدد الحالات ورافضة تصرح بالعدد الفعلي...كان المفروض ساعتها اعمل ايه؟؟؟ اقعد في السكن اللي مليان عدوي في انتظار المسحات ؟؟؟
سافرت يوم الجمعة الصبح وبلغتهم في البيت يفضولي اوضة لوحدي اتعزل فيها ومخرجتش من يومها ولا حد شاف وشي وعادة أصلا انا مش من النوع اللي بيخرج ولا بيحتك بحد حتي في الأيام العادية.
بعدها بيوم خبر الحالات اللي في الزهراء انتشر ووصل للإعلام وده أجبر الوزارة انها توفر مسحات للدكاترة المخالطين وبعد مناهدة مع الإدارة نجح بعض زمايلنا من الامتياز والنواب انهم يحصلوا ع مسحات بطلوع الروح ومش الكل اتاخد منه مسحات...لحد عدد معين لقوا ان عدد الحالات اللي بتطلع ايجابي كبيرة ووقفوا المسحات وأعلنوا المستشفي انها موبؤة وبلغوا اللي متعملوش مسحات انه ينزل يتعزل في بيته ١٤ يوم بعد كل المرمطة اللي شافوها واللي كان ايجابي منهم مكانوش عاوزين يودوهم مستشفي الأزهر التخصصي ومكانش متوفرلهم مكان يتعزلوا فيه ومعزلوهمش الا بعد مناهدة واتصالات للنقابة واحتجاجات وحاجزين ال٥ في أوضة وحدة في الأزهر التخصصي..من امبارح مش عاوزين يدخلوا زمايلنا الامتياز اللي اتصابوا وسايبنهم بايتين في الريسبشن والباقيين اللي في السكن بيضغطوا عليهم عشان ينزلوا يروحوا بيوتهم بعد طول المدة دي من غير مسحات
امبارح لقيت قرار من الوزارة نازل بعدم توفير أماكن عزل أو مسحات للمخالطين من الفريق الطبي وده وان دل علي شئ فبيدل ع ان الموضوع خرج عن سيطرة وزارة الصحة ومبقاش فيه أماكن متاحة للعزل.
انهاردة صحيت علي اختي بتقولي ان العمارة اللي انا ساكنة فيها من ايام م كنت طفلة ..السكان ييتكلموا ع ان عندنا في البيت حالة كورونا وانهم هيبلغوا واننا معندناش أمانة ومكتمين علي الموضوع...اظن اللي هيقرأ الكلام اللي فوق هيفهم انه لما يقول هبلغ هيكون بيهزر ومفكر الناس هتيجي بالبدل البيضا او الصفرا تقبض عليا😁...الحقيقة ان انا مبعملش حاجة غلط وياريت ي جماعة لو حد منكو عرف يتواصل مع وزارة الصحة ويوفرلي مسحة ومكان اتعزل فيه أكون شاكرة أفضاله جدا😏 خصوصا وانا معنديش أعراض ودرجة حراتي مش بتعلي عن 37.5...وشكرا انكو بدل م ترفعوا سماعة التليفون وتطمنوا عليا ..قولتوا لفرد امن العمارة مياخدش الزبالة من قدام البيت عشان ميتعديش ونشرتوا اشاعات في الحته كلها اني مصابة لدرجة ان اصحاب المحلات خايفين يتعاملوا مع ماما لما بتنزل تجيب لنا الطلبات ..واشتغلتوا في اللوك لوك والرغي_ وانتوا بتعملوا كحك وبسكوت العيد وبيتجيبوا لبس العيد وبتتعزموا عند بعض_ عن حالة الطبيبة المصابة بكورونا واللي هتوبئ العمارة كلها وهي مبتخرجش من أوضتها أصلا...انا مش هخاف عليكو اكتر م هخاف ع أهلي اللي ساكنين معايا في نفس الشقة...ومش انتو اللي هتعلموني اخد احتيطاتي انا واهلي ازاي.
واخيرا...انا مش مستغربة خالص اللي حصل لانه اذا كان وزارة الصحة نفسها مبتحترمناش الناس هتحترمنا ازاي؟
المصدر
https://m.facebook.com/story.php?story_fbid=2669106193195926&id=100002897158832
تعليقات
إرسال تعليق