أحمد صفوت يكتب عن مستشفى الزهراء الجامعي

حقيقي صعبان عليا الوضع اللي حاصل ف مستشفي الزهراء الجامعي , تخطينا اكتر من 42 طبيب مصاب ما بين قيادات الكليه و مدرسين مساعدين و نواب , دا غير 5 أطباء امتياز كلهم بنات من محافظات مختلفه منهم واحده روحت البيت و خالطت اهلها و بعدها بيومين بلغوها نتيجه التحليل , دا كله غير المصابين من التمريض و العمال اللي رقمهم كبير جدا مش صغير ,, ال5 طبيبات امتياز مش لاقينلهم مكان يتعزلوا فيه لحد دلوقتي , من العصر اتصالات و نكلم دا و دا عشان نعزلهم منهم 2 عندهم اعراض شديده بس للاسف مستشفى الازهر التخصصي بيقولوا انها اتملت و مفيش مكان , طبيب الامتياز دا لا محسوب علي وزاره الصحه و لا محسوب علي النقابه و في نفس الوقت جامعته اللي محسوب عليها بتعامله علي انه سوري ف اللفظ " نكره " رغم اهميه وجودهم و لان الامتياز مرحله مهمه جدا ف حياتهم العمليه كسنه تدريب ,, الأصعب من كدا بقى لما يكلمك اطباء مخالطين لزمايلهم و عندهم اعراض و مش عارفين يعملوا ايه ؟! تخيل انت لا عارف تحجز اللي نتيجته ايجابي و لا عارف تقول ايه للي عنده اعراض شديده ؟!فين ال100 مليار طيب ؟! فين المستشفيات الكتيره جدا اللي قولتوا انها جاهزه في حاله ازدياد الاعداد ؟! يعني هل يعقل ان الجندي لو في حرب و اتصاب تقوله روح عالج نفسك بنفسك ف البيت ؟! احنا يا اخوانا جنود من غير سلاح و الله و كمان لما بنتصاب بقينا ندور علي واسطه عشان نتحجز !!  

اي منطق يقولكم ان التعامل دا صح خصوصا مع زياده الحالات ؟! هو ليه مش عايزين نحس بـ اهل الاطباء دول اللي عايشين مرعوبين لو اولادهم اتصابوا لا قدر الله فلما يتصابوا يتقالهم اعزلوا نفسكم ف البيت ؟! او لما يتصابوا يتقالهم مفيش مسحات ؟! دا مرتضى منصور امبارح قال انه عمل 20 مسحه للعمال المخالطين للحاله المتوفيه ف نادي الزمالك طيب مين اولى بالمسحات الطبيب المخالط لحالات ايجابيه ليل نهار و لا للعمال المخالطين لحاله ايجابيه ؟! مع ان البديهي ان الطرفين يتعملوهم فحص , مين اولى بالعزل اللي ظهر عليه اعراض و ايجابي و بيشتغل ليل نهار ف وزاره الصحه و لا اللي ايجابي و معندهوش اعراض بس عنده واسطه ؟! 

#كارثه_مستشفي_الزهراء_الجامعي