نادر بكر يكتب بلاغ تفصيلي لمباحث الانترنت عن علي غزلان

طيب بما ان الدولة بدأت تهتم بالجرايم الإلكترونية وتقبض علي مشاهير السوشيال ميديا اللي بيرتكبوا جرايم قانونية يحاسب عليها القانون ..

خلوني استغل الوضع ده وأطلع ضيف المسرح العزيز ع قلبي علي غزلان مدمن النجاح والشهرة بس المرادي مش مسرح تحفيل .. ولكنه مسرح تغفيل

مدمن النجاح الجامد ابو دم خفيف أحيانا والمتدين أحيانا أخري ولايف كوتش أوقات تالته ودكتور جراحة أوقات رابعه .. أكبر نصاب في تاريخ السوشيال ميديا كلها تما .. خلوني أعرفكوا ازاي علي غزلان كون ثروته دي وإزاي بقي مدمن نجاح يمتلك عمارتين كاملين في 6 أكتوبر بيأجرهم للمغتربات فقط (مش مغتربين لأ ) مغتربات بنات بس .. وفيلا في مدينتي وسط الكوميونتي المختلف هناك .. ومجمع طبي ومطعمين وعربيات مرسيدس وممثلة شابه دمها خفيف زيه بالظبط .. بفلوسه يا كلاب

اللي في الاسكرينات عزيزي المتابع المحب لفقرة المسرح المخصصة بتاعتي هي اسكرينات لعملية نصب معتادة علي غزلان كون منها تقريبا 90% من ثروته .. عملية نصب كررها أكتر من 5 او 6 مرات في كل مرة كان بيكسب منها أقل واجب 2 مليون جنيه .. اتنين وجنبها 6 إصفار عمرك ما هتملكهم يا فقير ياللي مش قاعد في مدينتي

خلوني اشرحلكوا العملية دي بتتم إزاي .. علي مع مجموعه من أصدقاؤه المشاهير علي انستجرام قرروا يعملوا مسابقة لطيفة جدا عبارة عن ايه ؟

200 شخص من اللي نفسهم يتشهروا ويبقالهم اكونت علي انستجرام عليه مئات الآلاف من المتابعين كل واحد منهم يدفع ل (علي وشركاه ) 10 آلاف جنيه مقابل تزويد عدد الفولورز بتوعهم .. نضرب 200 في 10000 = 2 مليون جنيه .. اتنين وجنبها 6 إصفار يالا يا فقير انت وهو

بس ده مش نصب يا ندورة .. ده يدوب استغلال لا يحاسب عليه القانون أصلا . شوية عيال هبلة اندرإيدج ساذجين يعني والقانون لا يحمي المغفلين ..

ده حقيقي .. بس خليني اقولك النصباية بتيجي ازاي .. المفروض ان علي بينزل الاكونتات دي عنده هو وأصدقاؤه المشاهير وبيطلب من المتابعين الأذكياء فشخ اللي أكبر واحدة فيهم من مواليد 2000 انهم يعملوا فولو للأكونتات دي مقابل انهم يدخلوا السحب علي جوايز قيمة جدا بيقدمهالهم أبو دم خفيف بابا نويل كفر الشيخ دكتور جراحة قلب الأندرايدج علي غزلان .. جوايز عبارة عن (150 ألف جنيه جايزة أولي لصاحب الحظ الوفير - 20 موبايل ايفون حديث - 20 رحلة عمرة "عشان نكسب مصداقية الناس " - ترابيزات بينج وبلياردو وسداد ديون غارمين وليلة كبيرة اوي سعادتك ) .. تعمل فولو لل200 اكونت .. تدخل السحب علي الجوايز .. علي غزلان يعمل قرعه زي قرعته كده ويابخت اللي حظه حلو ويكسب في القرعه دي

طب ده كلام حلو والله وراجل كويس وبيوزع فلوسه الحرام ع الناس وبيعمل ثواب اهو بيحلل الفلوس بتاعته .. بس علي غزلان ليس هذا الشخص صدقني .. مش الشخص اللي يوزع مليون جنيه علي شوية عيال هبلة يعني بقولك بابا نويل كفر الشيخ .. علي ممكن يتخانق مع الويتر عشان خد 3 جنيه فكة من باقي الحساب بتاعه هيوزع مليون جنيه ؟ أكيد لأ يعني

فيقوم علي غزلان متفق مع اصدقاوه اتفاق لذيذ اوي .. اللي هو ليه نفرط في الجوايز دي ونعمل قرعة .. ما نطبخها سوا وخلاص .. ونشوف صحابنا ندي كل واحد فيهم الفين تلاته مقابل انه يقول انه كسب فعلا في المسابقة دي ؟! ويبقي وفرنا اكتر وكسبنا ال2 مليون كلهم او 3/4 يا سيدي بلاش طمع ؟

وده فعلا اللي حصل .. من غباؤه وغباء صحابه .. لان اكيد اللي هيصاحب علي غزلان مش شخص ذكي وعن يقين يعني .. ف ( عمرو يوسف ) شريك النصبايه دي وقع علي غزلان في المصيده وكشف ورقه .. كل المتسابقين اللي كسبوا المسابقة صحابه وعاملهم فولو ونسي يشيل الفولو ده او مجاش في باله ان حد من الفولورز اللي عندهم اللي بيشتركوا في نوعية المسابقات دي وبيجروا يعملوا فولو لأي حد علي بينزل أكونته عنده يكون ذكي وبيشغل مخه ويقدر يكشفهم

بات جيس وات ؟! كان فيهم الشخص الذكي ده وخد اسكرينات بتدين وتثبت النصبايه دي .. فيقوم (عمرو يوسف ) شريك الكفاح والنحتات والنصبات الجميلة عامل انفولوا لكل الاكونتات اللي كسبت بعد ما الواد اللي كشفهم خد اسكرينات وفضحهم .. عشان يثبت النصبايه عليهم أكتر وأكتر " منا قولتلك مفيش شخص ذكي ممكن يكون صديق لعلي غزلان "

المهم ان الاسكرينات اللي قدامكوا دي بتثبت كل الكلام ده .. بتثبت ازاي مدمن النجاح الدكتور المتدين ابن الناس الكويسين أبو دم خفيف عمل كل الثروة دي من تعبه وشقاه قدام موبايله تحت التكييف بالشورت القطيفة .. ده بلاغ أهو وبالإثباتات كمان لأي حد في الدولة حابب يتحرك ناحية الجرايم اللي بجد .. الاستغلال والنصب والسرقة اللي بجد .. ياريت فعلا يبقي في تحرك وتحقيق من مباحث الاموال العامة أو مباحث الانترنت في الموضوع ده واللي هيقدروا يثبتوه بكل سهولة .. ونقاكم في حفلة اخري من حفلات مسرح ندورة وشكرا

مباحث الانترنت

الشرطة المصرية

Egyptian Public Prosecution النيابة العامة المصرية